Үкімет кулуарында Ақпарат және қоғамдық даму министрі Дархан Қыдырәлі журналистіге жасалған шабуылдар туралы пікір білдірді, деп хабарлайды dasturkb.kz порталы BAQ.KZ сілтеме жасап.
Ақтөбедегі оқиғадан бастап журналистердің құқығын қорғауға, оларға әрдайым қолдау көрсетуге дайын екенімізді айттық. Ол туралы әлеуметтік желіде де, жеке өз аккаунттарымда да баяндадым. Сонымен бірге ол журналистермен кездестім, сөйлестім. Мысалы, Самал Ибраевамен әңгімелестік. Сол сияқты Гүлжан Ерғалиевамен кездесіп, басқаларға да қолдау көрсетуге әзір екенімізді жеткіздік. Мемлекет басшысы арнайы тапсырма берді. Сол бойынша кейбір күдіктілер ұсталып жатыр. Сондықтан өз бақылауымызда ұстап отырмыз. Әр уақытта журналистердің жағында және оларды қолдауға әзір екенімді тағы да айтқым келеді, — деп жауап берді министр журналистердің сұрағына.
Дархан Қыдырәлі журналист Динара Егеубаеваға шабуылдағандардың кім екенін пайымдап көрді.
Қазіргі таңда тергеу жүріп жатыр. Жақында қорытындысы айтылады деп ойлаймын. Жалпы 5 адамды тапты. Бірақ оларға тапсырыс беруші кім? Бұл жөнінде Мемлекет басшысы да анықтап айтты. Тек қана орындаушылар емес, бұларға тапсырыс берушілерді де анықтау керек. Мұнымен құқық қорғау органдары айналысады. Сондықтан жақында жауабын білесіздер деп ойлаймын, — деді Ақпарат министрі.
