2022 жылы 9 желтоқсан күні «Отырар» мемлекеттік археологиялық музей-қорығының ұйымдастыруымен «Археологиялық ескерткіштерді зерттеу, сақтау және қайта жаңғырту мәселелері» тақырыбындағы Халықаралық ғылыми-тәжірибелік конференциясы өтті.
Еліміздің археология саласындағы жетістіктерімен таныстыру, археология ескерткіштерін зерттеу, сақтау тақырыбында тәжірибе алмасу, Отырардағы археологиялық және реставрация жұмыстардың нәтижесімен бөлісу мақсатында өткен халықаралық ғылыми-тәжірибелік конференцияға шетелдік және еліміздің тарихшы ғалымдары мен археологтар, музей мамандары қатысты.
Конференцияның алғашқы құттықтау сөзін ҚР Мәдениет және спорт министрлігі, Мәдениет комитеті төрағасының орынбасары Сейітова Күміс Қарсақбайқызы алып, конференция жұмысына сәттілік тіледі. Одан соң, археолог-ғалым, дала академигі «Отырар» мемлекеттік археологиялық музей-қорығының ғылыми кеңесшісі Алдабергенов Нұртаза Орынханұлының туғанына 75 жылдығына орай ҚР Мәдениет және спорт министрі Абаев Дәурен Әскербекұлының құттықтауын оқып, сый-сияпат жасады. Құттықтау сөзді жалғастырған т.ғ.д, профессор Елеуов Мадияр Елеуұлы Әл-Фараби атындағы Қазақ ұлттық университетінің атынан арнайы төсбелгісін тапсырды.
Конференция барысында шетелдік ғалымдар: Рахимо Набиджон Турдиалиевич (Тәжікстан Республикасы), Жүнісова Алтынай Хайдуллақызы (Ресей, Омбы облысы), Асангулова Айдай Бектимирқызы (Қырғызстан Республикасы), Аталай Қаратақ, Ачелия Огуз, Фатма Шенол, Ахмет Шаншар, Зейнеп Йылмаз, Элиф Сарач (Туркия), еліміздің тарихшы ғалымдары мен археологтары: Елеуов Мадияр Елеуұлы, Таймағамбетов Жакен Қожахметұлы, Қожа Мұхтар Баһадүрұлы, Авизова Айман Қарайдарқызы және музей мамандарының Қазақстан археологиясындағы соңғы жылдардағы жетістіктері, Отырар қалажұртындағы консервациялық жұмыстар нәтижелері, Музей қорын жасақтау, реставрациялау, сақтау мәселелері, Мәдени мұрамызды еліміз бен шет елдерде насихаттау, Тарихи-мәдени мұра нысандарының қорғау мен олардың сақталуын қамтамасыз ету бағыттары бойынша баяндамалары тыңдалып, ой-пікірлері мен ұсыныстары айтылды.
Конференция оқылған баяндамалар мен ұсыныс-пікірлер ескеріле отырып, қарар бекітіліп, қаулы етілді.
Ұлылар мекені — Отырарда өткен халықаралық конференцияға қатысып, жоғары деңгейде өтуіне атсалысқан қатысушыларға алғысымыз шексіз.
