2022 жылы 7000 тарихи құжат шетелден Қазақстанға қайтарылды. Бұл туралы бүгін Мәдениет және спорт министрлігінің алқа отырысында министр Асхат Оралов мәлімдеді. Құнды жәдігерлерде еліміздің тарихы туралы ақпарат бар, олармен қазір отандық тарихшылар мен ғалымдар жұмыс істеп жатыр. Құжаттар Венгрия, Германия, Италия сияқты Еуро одақ елдерінен әкелінді.
Сонымен қатар, Асхат Оралов өткен жылы Мәдениет және спорт министрлігінің жүйелі жұмысының нәтижесінде 18 археологиялық зерттеу жүргізіліп, еліміздің түрлі өңірлерінде 30 ескерткіш қалпына келтірілгенін атап өтті. Олардың ішінде атап айтқанда Әзірет Сұлтан музей-қорығы, Отырар қалашығы, Жаркент мешіті, Ботай қонысы, Бөкей Ордасы, Ахмет Байтұрсынұлы мүзей-үйі, Бекет ата жер асты мешіті нысындары.
«Министрлік шетелден әкелінген тарихи құжаттардағы ақпараттың ғалымдардың зерттеулерінен кейін жария болуы үшін жұмыс жүргізетін болады. Бұл көзі қарақты оқырмандарымыздың еліміздің тарихы туралы жаңа білім алуы үшін өте маңызды. Сонымен қатар, министрлік сапалы кітаптар шығаруға ерекше көңіл бөледі. 2022 жылы өңірлерге 506 мың дана кітап жіберілді. Биыл бұл бағыттағы жұмыс күшейтіледі. Біз еліміздің кітапханаларын сапалы әдебиеттермен қамтамасыз ететін боламыз.»,-деді министр.
