Таң атпай елден кластас досым Елғонды Құрманбеков хабарласты. «Қасым, біздің ауылдарды су алып жатыр, естідің бе?» – дейді.
» Баяғыда, тоғызыншы сыныпта сен Түркістан аудандық «Коммунистік еңбек» газетіне «Ар жақтағы айқай» деген мақала жазып едің ғой. Ол айқайдан, бұл «айқай» кем емес. Одан да үлкен айқай, шу болып жатыр», – дейді Елғонды досым күрсініп.
Кейбір үйлердің ортасынан ағып өтіп жатыр деген хабар тарап жатыр. Мен шұғыл Түркістанға хабарласып белгілі журналист Тельман Бейсенмен сөйлестім.
Ол: «Біздің Бабайқорғанның «Абай», «Үлгілі»,»Мерген» ауылдарын су басып жатыр, – дейді.
Үлгілідегі Темір Есенгелдиевтің үйі құлапты. Әзірше құлаған осы үй ғана екен. Ұзақ жыл ел басқарған ағамыз Махамбет Дайрабаевтың, Есіркеп, Өтжан Әзімханов, Өмірзақтың қоралары құлапты. Құлбек, Сәрсенбектің үйлеріне су кіріп кетті дейді. Ораз, Сатыбалдының, Қалбайдың да қораларында қойларды судың ортасынан сыртқа шығарып жатыр екен.
Жүрегім қан жылап отыр.
Туған ауылымды су алып жатыр.
Биыл қар көп түсті. Жаңбырлы болды.
Асық ойнап, қозы баққан, жусан шауып, шөп орған қайран туған ауыл. Бәрі көз алдыма келе қалды.
Ең бірінші сұрағаным, адамдар аман ба? …
Таудың етегіндегі қар сіресіп тұрған, кеше түн ауа қатты жаңбыр басталған екен. Жаңбыр мен қар қабаттасып кеткен. Соңғы отыз, қырық жылда осындай оқиға болып отыр. Абайда «Қанай кеткен» сайы дес бермей суға толып, таудан қашқан топан су арнадан асқан. Қар жерге сіңіп үлгерген жоқ. Ерімей, тоңазып, қыс бойы сіресіп тұрған қар жаңбырмен араласып топан суға айналған.
Бұрыннан қалыптасқан, табиғи су жолдарын бекітіп тастаған.Үй салмайтын жерлерге тыңдамай үй салған.
Арықтарға рұқсатсыз тар трубалар салып тастағандықтан, топан су трубалардан асып, көшелермен ағып жатыр.
Негізінен қауіп төнген үйлер өзен бойындағы үйлер.
Видеоларды көріңіздерші. Обал. Өздері күндерін әрең көріп отырған үйлер бар. Сұмдық-ай. Дәл қазір Түркістаннан, Шорнақтан Бабайқорғанға қарай спецтехникаларды алып бара жатыр екен.
Қасымхан БЕГМАНОВ, ақын, Қазақстанның еңбек сіңірген қайраткері.
Turkistan24 арнайы шығарылым | Ақпандағы нөсер | 02.02.2023 — YouTube
