Сыбайлас жемқорлыққа қарсы іс-қимыл агенттігінің Түркістан облысы бойынша Департаментінің жанынан құрылған «Сапалы жол – адалдық алаңы» жобалық кеңсесінің 10 айлық қорытындысы бойынша мәжіліс өтті, деп хабарлайды «Дәстүр» сайтының тілшісі.
Жиынның басты мақсаты — облыс аумағында бюджет есебінен төселген жолдардың сапасы мен қауіпсіздігін арттыру және мемлекет бюджетін тиімді жұмсау.
Шараға облыс әкімінің бірінші орынбасары Арман Жетпісбаев, Сыбайлас жемқорлыққа қарсы іс-қимыл агенттігінің Түркістан облысы бойынша Департаменті басшысының бірінші орынбасары Мирас Қарғабай, «Жол активтері ұлттық сапа орталығының» Түркістан облысы бойынша филиалының директоры Мухит Ахметов сондай-ақ онлайн көрсетілім арқылы аудан әкімдері қатысты.
Мәжілісті Түркістан облысы әкімінің орынбасары Арман Жетпісбай ашып, жергілікті атқарушы органдардың міндеттерінің бірі — бюджет қаражатын тиімді пайдалану екенін атап өтті.
«Ең бастысы, қаражатты қажетті нысандардың құрылысына жұмсау қажет. Сондай-ақ, нысандардың сапасын қадағалап, жолдардың сапасы мен қауіпсіздігін арттыру керек, – деді Арман Жетпісбай.
Сыбайлас жемқорлыққа қарсы іс-қимыл агенттігінің Түркістан облысы бойынша Департаменті басшысының бірінші орынбасарының айтуынша, жыл басынан бері тұрғындардың арыз-шағымдары бойынша «Жол активтері ұлттық сапа орталығының» өңірдегі филиалының, «Түркістан – адалдық алаңы» жобалық кеңсесі қызметкерлерінің, Арнайы мониторингтік топ мүшелерінің және жергілікті әкімдік пен мердігер мекеме басшыларының, сондай-ақ БАҚ өкілдерінің қатысуымен облысқа қарасты қала және аудандардың автокөлік жолдарына мониторинг жұмыстары жүргізілген.
Айта кетер болсақ, жиын барысында жаңадан төселген жолдардың сапасы мен қауіпсіздігін арттыру бойынша ұсыныс-пікірлер ортаға салынып, мониторинг нәтижесінде анықталған кемшіліктерді болдырмау мәселелері талқыланды.
Алтынбек Құмырзақ
